Nungusaataanngitsumik ingerlatsinissaq ineriartortissagaanni nunarsuaq tamakkerlugu najukkanilu ajornartorsiutinik aaqqiiniaaqataanissaq pisariaqarpoq, imaanngitsoq ajornartorsiutinik pilersitseqataalluta ingerlatsissasugut. Polar Seafoodip angorusutaasa ilaat tassaapput inuiaqatigiit aningaasaqarnikkut inuiaqatigiinnikkullu siuariartorluartut. Taamaattumik inuiaqatigiinnut akisussaaqataalluta ingerlatsinissarput (CSR) qitiutittuaannarparput.
CSR-ip tungaatigut sulinitsinni makku suliniarfiginissaat qitiutipparput:
- Avatangiisit silallu pissusaa
- Inuiaqatigiit
- Aalisakkat qaleruallillu nungusaataanngitsumik pisat
- Sulinermi avatangiisit
1. Avatangiisit silallu pissusaa
Kalaallit Nunaanni aalisakkanik qalerualinnillu tunisassiortut annersaannut ilaavugut, taamaattumillu silap pissusaanut avatangiisinullu tunngasunut iliuuseqarnissamut pisussaaffeqarluta. Aalisakkanik qalerualinnillu tunisassiorneq nukissiutinik imermillu atuinartorujussuuvoq tamatumunngalu akisussaaffik ilisimaarilluarparput. Taamaattumik nukissiutinik imermillu atuinitsinnut isiginnittaaserput pingaartillugu ukkatariuarparput. Avatangiisinut silallu pissusaanut kingunipiloqannginnissaa anguniarlugu sunniutaasartut pitsanngorsarnissaat anguniarparput.
Makku pingaartillugit ingerlatsivugut:
- Nukissiutinik atuinitta millisinneqarnissaa
- Imermik atuinitta millisinneqarnissaa
- Tunisassiornitsinni tunisassiassanik atorluaanitta pitsanngorsarnissaa
- Eqqagassalerisarneq
2. Inuiaqatigiit
Polar Seafood isumaqarpoq pitsaasumik akisussaassusilimmillu iliuuseqartarneq imminut akilersinnaasoq, aammalu avatangiisitigut inooqataanikkullu pitsanngorsaaneq isertitaqarnissatsinnut iluaqutaasut. Aningaasatigut tapiisarnikkut najukkami inuiaqatigiinnut aammalu inuiaqatigiinnut kalaallinut iluaqutaanissaq Polar Seafoodip anguniarpaa. Ilinniartitaaneq, timersorneq, inooqataanikkut kulturikkullu ineriartortitsineq aammalu suliniaqatigiiffiit ajunngitsuliortartut Polar Seafoodip tapiiffiginerusarpai.
3. Aalisakkat qaleruallillu nungusaataanngitsumik pisat
TAC-mi (ataatsimut pisassatut akuerisat) piumasaqaatitut saqqummiunneqarsimasut aammalu pitsaassutsikkut inuussutissallu isumannaatsuunissaannut nunani ataasiakkaani nunanilu tamalaani inatsisit malittarisassallu tamaasa Polar Seafoodip malippai.
Tunisassiatta pitsanngorsartuarnissaat aammalu tunisassiornitsinni piumasaqaatit atuuttut malinnissaat anguniarlugu najukkami oqartussaasut, suliniaqatigiiffiit pisisartullu Polar Seafoodip ammasumik oqaloqatigiuarpai. Tamanna eqqumaffiginiartuarparput sulinittalu pilersaarusiornerani malittuaannarlugu.
4. Sulinermi avatangiisit
Polar Seafoodimi sulisut isumalluutitsinni pingaarnersaapput ullumikkullu inuit 900-t sulisoraavut. Sulisut tamarmik naligiimmik pineqarnissaat aammalu sulisut tamarmik ataasiakkaarlutik ataqqineqarnissaat pingaarutilittullu misigitinnissaat pingaartipparput.
Ingerlatseqatigiiffimmi tamarmi sulinermi avatangiisit pitsanngorsarniarlugit Polar Seafood suliaqartuaannarpoq. Sulisuvut pikkorissut sulisoriinnarumallugit ilorrisimaarnissaat suliaminnullu kajumissuseqarlunik sulinissaat anguniartuarparput, taamaattumik sulisut assigiinngikkaluarlutik suleqatigiinnissaat sulifeqarfiullu suliffigissallugu pilerinartuunissaa qitiutillugu suliuaannarpugut.
