Naalagaaffiit Peqatigiit piuaannartitsinikkut ineriartornissaq anguniarlugu suliaqarneq Sustainable Development Goals (SDGs) tassaavoq ataatsimoorluni akisussaaffigisariaqartoq: nunat ataasiakkaarlutik, suliffeqarfiit tamarmik aamma tamatta ataasiakkaarluta. Polar Seafoodimi akisussaaffik taanna ilungersorluta tiguarput.
Aalisakkanik qalerualinnillu suliffeqarfissualinni, innarligassaannginneq, akisussaassuseq uppernassuserlu apeqqutaatilluinnartillugu, Polar Seafood sivisuumik MSC-mik akuerisaalluni piuaannartitsineq aqqutigissallugu aammalu suliassaativut tamakkiisut aqqutigalugit suliniarnermi akisussaassuseqarneq ukkatarineruaa. Taamaattumik pissusissamisuuinnarpoq, Naalagaaffiit Peqatigiit piuaannartitsinermik ineriartortitsineq nunarsuarmioqatigiinnut anguniagai sinaakkusiaralugit ilitsersuutitut atortassagivut aalajangiiniartsilluta. Tamanna ulluinnarni pisussani tamaginni atuuttuuvoq, aalisaraluarutta, tunisassiorluta nioqqutissiorutta, poortuigutta, tuniniaagutta imaluunniit nioqqutissaativut siammarterlugit nassiussorutsigit.
Akuersaarparput, Naalagaaffiit Peqatigiit nunarsuarmioqatigiinni anguniagai 17-iusut pingaaruteqartut. Annertunerpaamik sunniuteqaqqullugit pingaarnerpaamik matuersaataasinnaasut pingasut toqqarsimavagut tassani Polar Seafood iluatsilluarnerpaamik tapersiisinnaammat. Sammisat taakkua takutippaat angusaqarluarusussuseqarnerput piviusumik allannguerusunnerput aamma siunissamik piuaannartitsinermik tunngaveqartoq kinguaariinnut tullinnguuttunut pilersikkusukkatsigu.
Polar Seafood isumaqarpoq, ilinniartaaneq qaffasittumik pitsaassusilik aalajangiisuusoq piuaannartitsilluni ineriartortitsiniaraanni. Nunatsinni suliffeqarfinni privatimik pigineqartuni anginerpaajulluta ilinniartitaanermik tapersersuilluta akisussaaffik tiguarput tamannalu aqqutigalugu kalaallit Inuiaqatigiit ineriartorneranut tapertaalluta. Aamma qulakkeerumavarput, sulisuvut suliffissuarmi tamarmiusumi pisariaqartunik piginnaaneqassasut ingerlaavartumik ilinniaqqinnissamik periarfissiinikkut neqerooruteqarnitsinni.
Ilinniartitaaneq nukittorsarniarlugu Polar Seafood ilinniarnissamik trainee programmimik inerisaasimavoq Kalaallit Nunaanni ilinniarfeqarfiit nunallu avannarliit peqatigalugit. Ilinniarnissamik aaqqissugaq inerisartinneqarsimavoq siunissami kilisaatini naalakkat – officerit - suliamut inuttullu inerisarnissaat siunertaralugu.
Akisussaassuseq innarligassaannginnerlu aallaqqaammulli suliffeqarfimmik aqutsiniarnermi tassaasimavoq Polar Seafoodimut qitiutinneqartoq. Nunarsuarmi pinngortitap pisuussutaasa annertusiartuinnartumik piumaneqarlutik nungusarneqarnerat ilutigalugu, uagut aalajangeqqavarput tunisassiornikkut atuinikkullu akisussaassulimmik inerisaaniarluta. Pisuussutit taakkua kinguaariit tullinnguuttut eqqarsaatigalugit piuaannartinneqartariaqarput.
Pilersinniakkat ilaat ataaseq tassaasimavoq puussiat plastiusut atoqqissinnaasutut ikaarsaariarfigissallugit Esbjergimi tunisassiorfitsinni, atuisartunut poortuinermik atortuusimasunik immikkoortiterilluni atoqqiineq ajornannginnerulersissallugu. Ingerlaatsimi tassani paasineqarpoq puussiat tunisassiarineqalermata nukissatigut sipaartoqarsinnaasoq.
Immami uumasut piuaannartitsinikkut inerisaanermi uagutsinnut tunngaviulluinnarpoq, aamma nunarsuarmioqatigiit annertusiartuinnartumik aalisakkanik piuaannartitsineq tunngavigalugu pisanik apeqqutilliiartuinnarnerat pingaarnersiuinermi matumani takutitsilluarpoq. MSC-mik akuerineqarneq aqqutigalugu nioqqutissiavut ilai iluatsilluarsimapput tamannalu Polar Seafoodimi ukiorpaalunni suliniutigereeratsigu nioqqutissanik taamaattunik apeqqutilliisut amerlatsikkiartuaarnerat nuannaarutigaarput.
Immami pisuussutinik isumassuineq nunatsinni kalaallini qangarsuaaniit ileqqutoqaavoq, kinguaariinni tulleriinnilu tamanna kingornussaalluni ingerlaqqittuarsimalluni, tamatumani tunngavigineqarmat atuipilunnermik pissuseqaraanni kaannermik kinguneqarsinnaasoq. Polar Seafood Kalaallit Nunaanni sorlaqarnini tanngassimaarutigalugit tunngavimmik taassuminnga ingerlateqqiiniarpoq, tassami piuaannartitsineq pissusissamisoortuulluni ingerlateqqitassaavoq ullutsinni mutiusumik industrialiserikkamillu aalisartoqaleraluartoq.
Polar Seafoodip qullersaqarfia Nuummi inissisimavoq, Kalaallit Nunaanni, aalisarnikkullu ingerlatseqatigiiffinni privatimik pigineqartuni anginersaajulluni. Polar Seafood pingaaruteqarluinnartumik aalisakkanik qalerualinnillu pisiortorfiuvoq, nioqqutissiaatai suliffeqarfinnut tunisassiorfiusunut, amerlasuunngorlugit tunisisartunut, nerisassiornermik sullissisunut aamma nioqqutissianik ataasiakkaanik pisisartunut.