Polar Seafood nammineq kilisaataatini mutiulluinnartut aamma immikkut aalisarnermut immikkut piginnaaneqarluartut, sanaajupput iluatsilluinnartumik aalisakkanik pisaqarnissamik aamma ingerlaatsini tamani qaffasinnerpaamik pitsaassuseqarnissaat qulakkiissallugu. Aalisariussuit taakkua piniakkatta annertunersaa pisarisarpaat. Angallatit atortulersugaapput aalisarnermut ingerlatassanut assigiinngitsunut issittumilu piumaffigineqaqisumut aalisarnissaminnut naleqqusagaalluinnarlutik. Pisat aamma najukkami sikumiit aalisarnermiit kiisalu najukkami inuiaqatigiinnit angallateerarsortunit pisanik aamma tapitartuunneqartarlutik.
Tunisassiornerup annersaa kilisaammi ingerlanneqartarpoq, nioqqutissat tassani suliarineqartarput, pisallu ilai sukkasuumik qeritissorneqartarlutik nutaarsunninnissaat pitsaassuseqarluarnissaallu eqqarsaatiginerullugu. Kilisaataativut arlallit piginnaaneqareerput suulluunniit pisarineraniit nerisariaannanngorlugit suliarisinnaallugit. Kilisaataativut aaqqissugaareerput eqqiluisaarnissamik- pitsaassutsimullu piumasaqaatinut sakkortunerpaamik piumaffigineqarlutik, tamakkualu ilaatigut suliffeqarfiup iluani nammineq pitsaassutsimik nakkutiginninnermik ingerlappavut aamma inatsisitigut piumasaqaataasut malilluinnarlugit.
Aalisarnermi teknologi siuarsagaalluinnartoq ineriartornerlu
Ingerlaavartumik aningaasaliisarpugut aalisarnerup iluani ineriartornikkut atorluarsinnaasunik atortunillu, annikinnerpaamik immap avatangiisiinut sunniuteqarnissaq anguniarlugu. Tamanna pissutigalugu kilisaataativut siuarsagaalluinnartunik aaqqissugaapput, qulakkeerniarlutigu avatangiisinik sunniinissarput annikinnerpaaffissamiitikkusullugu aamma aalisarnerput sunniuteqarluarnerpaamik kinguneqaqqullugu.
Kilisaataativut aaqqisukkanik assigiinngitsunik aamma ungaluusanik pilersugaapput, saniatigut pisarnaveersaarnissarput anguniarlugu. Ukioq 2004-miit raajarniutivut tamarmik ungaluusanik Nordmore-gitterinik pilersugaapput saarullinniartilluta, qaleralinniartilluta allanillu aalisartilluta saniatigut pisavut annikillisarniarlugit. Ungaluusat immikkoortiterinermut atortut aamma atorneqarput aalisagaaqqat naqqatigut aalisarnitsinnut pulaqqunagit. Tamakkua saniatigut aamma ilagivaa, aalisakkat allat, immami timmissat aamma imarmiut pinngortitaassutsimikkut pissuserisaat innimigalugit ajortumik sunniuteqaqqunagu aamma aalisarnerup suli toraarnerusumik ingerlanneqarnissaa siunertaralugu.
Taamatut pinaveersaartitsilluni malittarisassiorneq, aamma “teknikkikkut iliuuserisassanik” taaneqartartut, ingerlaavartumik suliarisarpavut, taamaalilluta oqarsinnaavugut Polar Seafood akisussaafferujussuarmik tigusisoq ineriartornikkut siuarsimanerulluni inissisimanerminni. Avatangiisinik qaffasinnerpaamik akisussaassuseqarumalluta tamanna aqutsiniarnitsinni aamma aalisartortatta akornanni, qanimut suleqatigilluinnarpavut aalisarnermik atortussanik teknologiimik inerisaasut aamma biologit, tamatumani siunertariuaannarumallutigu pinngortitaq sunniuteqarluarnerpaamik sullikkusullugu.
Polar Seafoodip qullersaqarfia Nuummi inissisimavoq, Kalaallit Nunaanni, aalisarnikkullu ingerlatseqatigiiffinni privatimik pigineqartuni anginersaajulluni. Polar Seafood pingaaruteqarluinnartumik aalisakkanik qalerualinnillu pisiortorfiuvoq, nioqqutissiaatai suliffeqarfinnut tunisassiorfiusunut, amerlasuunngorlugit tunisisartunut, nerisassiornermik sullissisunut aamma nioqqutissianik ataasiakkaanik pisisartunut.