Polar Seafood Group tunisassiorfiit mutiunerpaat Nunatsinni, Danmarkimi Norgemilu ingerlappaat, taakkunani raajat immami nillertumeersut, saattussat aamma kongekrabber qaffasinnerpaamillu pitsaassusillit tunisassiaralugit poortorlugillu pisisartutsinnut nunarsuarmeersunut nassiuttarpavut.
Kalaallit Nunaanni tunisassiorfivut tassaasut Polar Raajat Nuummiittoq aamma tunisassiorfik Aasianniittoq, immami nillertumeersunik raajanik uuttanik qalipaajakkanillu, nunarsuarmi anginerpaajulluta tunisassiarivagut.
Danmarkimi Esbjergimiippoq Naajaq Seafood raajanik poortuisoq, aamma Polar Salmon Hjerting Laks aalisakkanik tunisassiortoq Danmarkimi ileqqutoqqat malillugit qangatut pujoorineq atorlugu tunisassiortoq. Tamaani aamma illu nillataartitsivissuaq nassaarisinnaavat pallet 4.500-it imarisinnaallugit, taavalu Vester Hassingimi illu nillataartitsivipput aamma mutiulluinnaqqissaartoq Vodskov-imi allaffitta qanittuaniittoq pallenik 8.500-inik imaqarsinnaasoq.
Norgemi tunisassiorfiit arlallit Finnmark-ip sineriaa atuarlugu inissisimapput, Barentsip Imartaanut qanittunnguami inisseqqapput, tassami aalisarfiit aalisagaqaqisut eqqannguaniimmata. Tamaani tunitsivissuarnut nioqqutissatsinnik aalisakkanik nutaanik aamma kongekrabbe-nik pisiortuivugut, poortuivugut aamma nassiussuilluta.
Polar Seafoodip qullersaqarfia Nuummi inissisimavoq, Kalaallit Nunaanni, aalisarnikkullu ingerlatseqatigiiffinni privatimik pigineqartuni anginersaajulluni. Polar Seafood pingaaruteqarluinnartumik aalisakkanik qalerualinnillu pisiortorfiuvoq, nioqqutissiaatai suliffeqarfinnut tunisassiorfiusunut, amerlasuunngorlugit tunisisartunut, nerisassiornermik sullissisunut aamma nioqqutissianik ataasiakkaanik pisisartunut.